دكتورة : ملتحمة العين مرض ماخطير لكن صعب السيطرة عليه 

انتشرت في الآونة الأخيرة تزامنًا مع فصل الخريف عدة أمراض، من بينها وباء ما يُعرف بالتهاب “ملتحمة العين” الفيروسي، والذي انتشر بكميات كبيرة في مناطق متفرقة من البلاد الأمر الذي دعانا لإجراء حوار مع الدكتورة “عفاف رضوان عبدالله” لنقف من خلاله على معلومات تُلخّص المرض من عدة مصادر، أهمها “جمعية البصريات السودانية” للاحتراز والوقاية من الإصابة، لا سيما أن الوباء يُعد الأسرع انتشارًا، ولكي نحمي أنفسنا ومن حولنا من العدوى أجرينا الحوار التالي: بدءًا دكتورة، ما المقصود بـ “ملتحمة العين” ؟

ملحتمة العين مقصود بيها الغشاء الرقيق البغطي لينا العين، والجزء الداخلي من الجفن العلوي والسُفلي. فالتهاب ملتحمة العين بأثر لينا في الغشاء دا وبظهر لينا إحمرار شديد عشان كدة بنسميها العين الوردية (pink eye).

◾يعني الالتهاب بصيب لينا الحتة دي بالتحديد ؟

بالضبط .. الالتهاب الحاد بصيب لي الملتحمة والسبب قد يكون (بكتيري) أو (فيروسي) أو تحسُّس عادي من مسبب خارجي كالعطور وغيرها، والنوع الشائع الفيروسي يمثِّل حوالي 80% من الحالات.

◾في معلومة شائعة بتقول : الالتهاب البكتيري أخطر من الفيروسي، الكلام دا صحيح .. وكيف نعرف البكتيري من الفيروسي ؟

أول حاجة الناس لازم تفرّق بين الالتهاب البكتيري والفيروسي. البكتيري بكون فيو افرازات صفراء زي ما نحن بنقول ليها بلغتنا العامة(القضا) بكون افرازات كتيرة شديد إضافة إلي إحمرار في العين. أما الفيروسي بكون إحمرار شديد مع افرازات في شكل (دموع) لكن مافي (قضا) بالاضافة للورم والحكة. العدوى سريعة الانتشار في النوعين عادة ببدأ بعين واحدة ومع سرعة العدوى بنتقل للعين التانية وبتصير العدوى في العينيين والتهاب ملتحمة العين سواء كان فيروسي او بكتيري ما بسبب خطورة كبيرة للمريض الخطورة تكمن في سرعة انتشاره.

◾الالتهاب بنتشر بكميات كبيرة، شنو البخلي العدوى سريعة الانتشار ؟

فعلاً ؛ لأنه الفايروس بعيش فترات طويلة خارج الجسم تصل إلى (3) شهور حتي في اقسى الظروف الفايروس بعيش. السبب التاني بمجرد وصل الفايروس للعين الشخص المصاب بكون حامل للمرض من غير اي أعراض لفترة من (7) إلى (10) أيام في الفترة دي بكون الفايروس معدي من غير اي أعراض مرضية واضحة، وبعد (10) يوم بتظهر الأعراض.

◾طيب ممكن في الفترة دي الشخص حامل المرض ينقل العدوى قبل تظهر عليهو الأعراض ؟

أيوة .. ممكن ينتقل عن طريق اللمس قبل تظهر عليه الأعراض؛ عشان كدا الانتشار للفايروس كبير والسيطرة عليهو بتكون صعبة.

◾هل الأعراض ممكن تختلف من شخص لآخر ؟؟

الاعراض عمومًا بتختلف من شخص لآخر وحتي فترة الشفاء من المرض بتختلف وكلها ع حسب الجهاز المناعي للشخص. الأعراض بتكون تورم جفن العين واحمرار العين، تحسُّس وحكة، عدم تحمل الضوء، الألم كذلك حِدته بتختلف من شخص لآخر، واحيانا تورم الغدد الليمفاوية.

◾بعد الانتشار الكبير للملتحمة، هل في ليها علاج ؟

عموما التهاب ملتحمة العين ما شي خطير وعلاجو ساهل عبارة عن Supportive treatment

يعني بدي علاجات تهدي للمريض لحدي ما الفايروس يتم فترتو وخلاص. الأمراض دي بتقال عليها self limiting بتاخد فترتها وتروح وأغلب الأمراض الفيروسية ما بتحتاج علاج. العلاج يبدأ بالمكمدات الباردة والقطرات المرطبة والادوية الاستيرويدية

المكمدات الباردة كالاتي بجيب قطن معقم وموية باردة بعمل مكمدات كل (6) او (4) ساعات. القطرات المرطبة مثال ليها :

Tear natural

Isotears

Hyfresh

Hylocomod

وفي كم شركة مع الحرب دي المتوفر بس الناس تستعملو زي Steroids : مثال ليها (Optipred ED) او أي استيرويد متوفر في الصيدلية

◾العلاج دا للفيروسي ولا البكتيري ؟

العلاج للفيروسي أمّا إذا كان الالتهاب الفيروسي مصحوب بالبكتيري هنا في الحالة دي بستعمل قطرة مضاد حيوي :

Moxifloxacin

Gatifloxacin

Ciprofloxacin

او أي مضاد حيوي متوفر؛ نسبة لأنه مع ظرف الحرب في شُح كبير في الأدوية، وإذا الالتهاب بكتيري وفي إفرازات صفراء في العين، هنا بستبدل المكمدات الباردة بالمكمدات الدافية، بنفس الطريقة العملنا بيها المكمدات الدافية أو مكمدات موية الشاي السادة ؛ لأنه (الشاي) معروف بخصائصه المضادة للبكتيريا بالاضافة للقطرات المرطبة الذكرناها .. عندنا في الصيدليات قطرات مركبة ممكن تفيد في حالة الالتهاب الفيروسي والبكتيري زي ال optidex T وباقي الشركات ..

◾أعرف كيف التهابي مصحوب ببكتيري ؟

ايوااا .. من خلال الافرازات الذكرناها فيروسي مصحوب بدموع وبكتيري بكون في إفرازات صفراء (قضا).

◾طيب “الوقاية خيرٌ من العلاج” أهمّ طرق الوقاية شنو ؟

البداية من كيف أمنع انتشار المرض، أو أحمي نفسي منه عن طريق (غسل اليدين باستمرار والتعقيم) بالذات لما نلمس الوش. وما نتشارك قطرة مريض .. المريض نحاول نعزلو ما عزل كامل (احتراز بس)، ننصح المريض يغسل اليدين بالذات اذا لمس العين او الوش عموما وما يهبش الاسطح عشان ما ينقل الفايروس ع الاسطح، ونغير ليو الفرش حقو، نديهو مناديل للعين ونرميها ع طول بعد الاستخدام نحافظ ع نظامة المنطقة عموما المريض يستعمل بشكير مخصص . يمنع نفسو من مشاركة الآخرين الأفراح والأحزان والحتات المقطوعة منها الشبكة ما يمشي “الاستار لينك” ما يترسل الدكان ويبعد من اللمات ..

الصلاة كمان اذا المريض صلى ويديه ملوثة ممكن البصلي بعدو يتصاب، نحاول نخلي مصلاية مخصص لاي فرد.

بالنسبة للبنات ما يستخدمن أدوات المكياج مع بعض خصوصا ادوات العين .. وأي مكياج اذا ظهرت اعراض للبت نحاول نتخلص منها لأنه حيكون فترة حضانة الفايروس البت بتستعملهم قبل تظهر الاعراض.

◾أشكرك دكتورة علي المعلومات القيمة .. تمنياتنا بدوام الصحة والعافية. أي إضافة ؟

أشكرك .. ما اعتقد في حاجة نسيناها بس حابة اضيف لي انو الناس ما تخاف ونحاول نطبق طرق الوقاية الصحيحة ونقلل حدوث المرض، ودي واحدة من تداعيات الحرب اننا طبيعي نواجه اوبئة كتيرة وان شاء الله مع تظافر جهود كل الكوادر الطبية في السودان نقدر نعدي المحنة دي على خير وتررجع البلد آمنة مطمئنة، وكل المستشفيات ترجع احسن والخدمات تتسحن بشكل اكبر والناس تتكاتف مع بعض وتقدم الخدمات والنصائح المطلوبة حاليا كل الكوادر الطبية بتعمل تحت ظروف سيئة وصابرين ومرابطين، ودعواتنا لي البلد. لو في أي استفسار أو إفادة ممكن نضيفها عبر المنصات الإلكترونية للناس الحابة تستفسر. تمنياتنا بالصحة والسلامة للجميع، وسودان آمن ومستقر.