الجمهورية نيوز : خيرالله الشعراني
تحصل موقع الجمهورية نيوز الإخباري على نص رسالة مؤثرة كتبها الشيخ محمد سيد حاج رحمه الله تعالى قبل 30 عام بشأن موضوع زواجه.. رواد مواقع التواصل الاجتماعي اندهشوا من الخطاب الراقي والكلمات المعبرة التي كُتب بها الخطاب… بالصور شاهد نص الرسالة… الرحمة والمغفرة للشيخ محمد سيد حاج.
(نص الرسالة كتابةً)
١٣ ذو القعدة
بسم الله الرحمن الرحيم
الوالد العزيز المفضال سيد محمد حاج والوالدة العزيزة عواضة والاخ جعفر والاخوات عطيات وعبير وعازة وحليمة وشريفة حفظكم الله
السلام عليكم ورحمة الله وبركاته
أولاً نحن في أشد الشوق لكم ودائماً في بالنا وكل الذي يهمني صحتكم وعافيتكم وحالكم وأحوالكم.
طبعا حبوبة وصلت وحكت ليكم عن الجيلي وناس الجيلي بيسألوا منكم طوالي وخاصة محمود سيد.
أما انا فحالي طيب والدراسة ولله الحمد مستمرة كويس مافي اي عوجة ولكن المشغولية واصلة وكثيرة مرة في الجيلي ومرة في الفتيحاب وهي بعيدة ومرة في شرق النيل وربنا يهون ويسهل القاسي.
وبعدين موضوع عطيات كيف وإن شاء الله روحها المعنوية مرتفعة وكيف إمتحانات عبير وجعفر عامل كيف.
طبعا أنا قررت قرار أخير وجاد وجازم وحاسم وهو إنه اعمل العقد يوم ٢٨/ذو القعدة اي قبل العيد ب ١٢ يوم يعني بعد ١٥ يوم من تاريخ كتابة هذا الخطاب.
وصراحة أنا ما داير زحمة كثيرة لأنو الظروف صعبة فالذي أريده أبوي وأمي وخال واحد وعم واحد والباقي من ناس الخرطوم. وأرجو وضع هذه الأمور في الحسبان
وطبعاً أنا قررت القرار ده لأنو حدثت مستجدات لذلك قررت أعقد دون الدخلة.
والذي أرجوه من الوالد والوالدة العفو عني لو أثقلت عليهم وأتعبتهم ولو عندهم رأي غير كده ممكن يقولوه لي ولكن في أقرب فرصة ولأنو موضوع يوم ٢٨ ذو القعدة أنا جاد فيه شديد.
وطبعاً كلموني إنو أعقد وأنا رفضت ما أعقد إلا في حضوركم لأنو دا أول فرح عندكم وأنا دايركم تفرحوا بي.
وتحياتي لجميع الأسرة والعم محمد حسن وأولاده والخالة جواهر والخالات زينب وكريمة وازاهر وسهير والحبوبة خديجة وفتحية وكل أهل الشارع والخالة أمنة.
والسلام
إبنكم/محمد سيد.
ملحوظة**
عم محمد عمل في الإنتخابات شنو والفاز منو؟
وطبعاً العقد يون ٢٨ وهو يوم جمعة وطبعاً حتصلوا قبل اليوم ده بيوم أو يومين
