كتبه / السر القصاص
عتاب :
ليه فجأة دون أسباب
من غير عتاب أو لوم
أخترت غيري صحاب
وأصبحت قاسي ظلوم
هان ليك فراقنا خلاص
وانا برضي حولك أحوم
كان عهدي بيك ترعى الصلات
وأجمل صلاتنا تدوم
أمل المحبة سلام
/////////
الناس والظروف
لكن ظروفك أبت
وقست ظروفي علي
واتلاشت الأحلام
وين حسن ظنك بي
وريني أيه ضراك
لو كا صبرت شوية
سخانة بورتسودان
الحنين قاتل يا سادتي .. كم قضى معنا الصحفي الجسور عطاف عبد الوهاب اجمل ليالي العمر واسواء ظروف الحياة ، سخانة بورتسودان وزنقاته .. كان حلوا كمر النسيم ومرا علقما ، زاد وكفاية ،، اخ وحبيب مشاكس مصادم ولكنها الحياة قد تمنحك كل شيء إلا اختيار الاحباب والرفاق هم نتاج مشينا في الحياة .
لي معه قصص وحكايات وشوية مؤامرات وبعض ما يحكى وكل الذى لا يقال .. اخ وصديق عزيز عطاف عبد الوهاب.
عزانا في التلاقي دنيتنا صبحت رسائل واتساب وفجاءة زاتو انقطعت .
اكرمنا بكرمه وزادنا نفر وازددنا كيل بعير .. عطاف عبد الوهاب.
ولعل السؤال عن الناس من شيم الحياة التى قد نرحل عنها في لمحة .. وما تغني زيدان في رمشة عين ابعدوك يا صديقي .
الخوة والتقدير
ولعلي افتقدت خوته النضيفة معنا وعمته القيافة وسيرته السمحة رغم اختلاف البعض معه لكنه بادلنا الاحترام والتقدير فله السلام اينما كان ولكنه قطع رسائله واتصالات فجاءة وهذه معاتبه مفتوحة الاضلع والاجابات ولكنها في الخير والمحبة وبعض الامل وبعض ساعات الحياة .
عطاف عبد الوهاب!
وين رسائلك
وين رسائلك يا حليلا وين عيونك مننا
نحن ناس بنعيش حياتنا الغاليه بالنيه السليمه
وكل زول دايرين سعادتو تشهد الايام عليمه
ساب ديارنا و فاتنا ياطير
مالو فات اهلو ديارو
والفراق بتقولو عيونو
قسمة ما كانت بختيارو
يلا لتوتيل نزورها
والجبل نعسان خدارو
حتى السواقي بكت معاي
شاركت في وداع قطارو
عشرة الأيام
عطاف عبد الوهاب اخ وصديق وعشرة الايام وعمر ، اختلف الناس أو اتفقوا حوله لنا معه ملح وملاح كن بخير يا صديق السلام والحروب ولكم تبدلت النفوس ولكنك صافي من عرفناك .
