الجمهورية نيوز : خيرالله الشعراني
نشرت المطربة السودانية هُدى عربي بوستاً عبر صفحتها الرسمية على موقع التواصل الاجتماعي فيس بوك قالت فيه : يا جماعة بحري دي قصة جميلة شديد اهم مافي بحري اننا كدة كبحراويين خالص ما عندنا تجاه بعض احساس في حلة احسن من حلة احساس في ناس احسن من ناس بإختلاف سحناتنا وجذورنا المختلفة انت من وين من بحري خلاص بحري يعني بحري ما بحتاج ذاتو تقول اي حي ارتباطنا وتداخلنا مع بعض لا يوصف من ناحية نسب وجوار وزمالة دراسة وكورة ( الشباب ) طبعاً بتعارفو بسبب نادي العامل ونادي الكفاح والاتحاد البحراوي
تلقى ناس حلة خوجلي وحلة حمد تربطهم اواصر القرابة والدم لكن تربطهم بالاحياء التانية مية سبب بحبو الاملاك عشان حديقة عبود وسينما وطنية وابو جابرة والزوادة وزمااااان كازينو النيل الازرق وطبعاً ما بننسى حفلات عقد الجلاد زمان
بحبو ديوم بحري فيها سعد قشرة بنحب الختمية بنحب المزاد بنحب الدناقلات شمال وجنوب فيها زملاء الدراسة ونمشي الدناقلات شمال وجنوب مرتين في اليوم ( كداري) ما بنحس بي اي تعب بنحب الشعبية وسوق الشعبية وصيدلية السنجك وناخد اللفة حبة نلقى الهجرة والمظلات تواصل تلقى روحك في الصبابي وما ادراك ما الصبابي زمن المدرسة والرابطة وكورال الرابطة لكن الاساتذة الله يطراهم بالخير دقونا جنس دق استاذ يس بشير واستاذ محسن واستاذ ياسر اسحق واستاذ صاندي واستاذ شمس الدين ومحمد بابكر اتمناهم بخير كل شباب بحري على مر الأجيال كل شلة مستحيل تكون من حي واحد لازم يكون فيها من كل الاحياء ودة الخلق الحميمية بين الناس على مر الزمان نجي لي بيئة بحري بيئة التصوف تلقى الضريح الفاح طيبه عابق والصالحين اهل القبب ضريح السيد على الميرغني وقبب الشيخ خوجلي ابو الجاز ( جدي) وحمد ود ام مريوم وشيخ موسى في بحري تلقى الفن عن نفسي بيتنا تمشى منو ورى تلقى بيت الفنان عبد العظيم حركة تمشي شمال تلقى بيت الفنان عبد الكريم الكابلي
تقطع الزلط تلقى بيت ابو داؤود
تمشي المزاد محمود عبد العزيز
تمشي الختمية محمد ميرغني
تصل شمبات خضر بشير وصلاح بن البادية تصل الحلفاية بشير عباس واسماء حمزة ترجع بالزمن شدييييد تتذكر كان في فنان عظيم الله يرحمه ايوب فارس واسماعيل عبد المعين وقدورة الله يرحمه حدك ابو حليمة تلقى النور الجيلاني الله يمد في ايامه فن فن في اي حي ودة الشكل وجدان زول بحري البيئة الصوفية والفنية عشان كدة ما بتذكر قابلني قريب زول من بحري ( فقري ) ناس حنينييييين ولطيفين يشبهو مدينتهم اما لو قررت تطلع على شمال بحري ابلغ وصف قاله لي ود خالتي الله يطراهو بالخير ساكن الخوجلاب قال لي مما تصلي الكدرو الجو بتغير كانو الدنيا سخانة وفتحتي تلاجة في وشك كناية عن لطافة الجو المهم بنحب بحري شديد ومشتاقين ليها شوق شديد اقعدي عافية يا بحري.
